..

تجاعيد قلبي الهرم لم تعد تتحمل تفاهات الحب وسخافاته

الحزن لا يليق بالجميلات

هن فقط خلقن للسعادة، للضحكات العالية

لرؤية العالم من فوق السحاب

ليلمس العشق شفاههن في تألق

تلك العيون لم تخلق يوما للبكاء

او للسهر

او للارق

خلقت لتلمع من حب او نجاح

فليكن الله في عون من احب فتاة جميلة 

فلن يرضيها الغزل العادي

ولا الحب الهادئ

فهي مغرورة بكل ما لديها

لا تعرف حدودا في الحب

وستطمع دوما ان يزيد

نروح فين

الناس في مصر مؤخرا بقت بتحاول تدور على اي فرصة للهروب، انما بشغل في الخليج او هجرة لاي دوله في العالم، المشكلة ان حتى الدول برة سواء في الخليج او غيرة 

واقعها مش مختلف كثير عن مصر

سعر البترول الي نزل وهينزل كمان خلى الدول دي بتتخبط وخصوصا السعودية، فك العقوبات عن ايران وتسهيل تصديرها للنفط ضرب الدول العربية في مقتل

واسوأ الاوضاع على الإطلاق في السعودية، أزمة بترول مع حرب على اليمن استنزفت كل مواردها الاقتصادية تقريبا، الحكومة رفعت كل الاسعار ( بنزبن، وكهربا ومية وايجارات) بيضغطوا على الناس بشكل رهيب

ازمة شركة بن لادن بعد حادثة الرافعه في الحرم خلت وضع المهندسين مزري

مفيش رواتب، تصفية موظفين بشكل جنوني

وكل القطاعات من المقيمين اتأثرت بشكل او بأخرخلى الوضع المعيشي في السعودية صعب

والكويت قبلها بكام سنة سدت كل الطرق على المقيمين ورفعت عليهم الاسعار وقللت المرتبات 

قطر هي افضل دول الخليج حاليا، وخصوصا مع الاستعدادات الرهيبه لإستضافة كأس العالم، والمشروعات الضخمة 

الإمارات برضه الوضع صعب على المقيمين وعلى المصريين بشكل خاص، الاسعار جنونية والإيجارات تعتبر من الأغلى على مستوى العالم

مقدرش اقول لحد خليك في مصر لو جالك فرصة في الخليج لأن الوضع في مصر كلمة سيء أو مزري قليلة عليه، بس الوضع براها مش بالروعة الي الناس متخيلاها

ياريت الواحد يعرف يهاجر دولة أجنية وياخد جنسية تخليه يقدر يعيش كبني آدم 

الحكومة ومصالحها

تباَ للمصالح الحكومية في مصر، وتباَ لكل الشبابيك بها

الاستمارة شباك 4

التسليم شباك 3

طيب ما حضرتك تسلميها للي جنبك مش لازم اخد الطابور من اوله تاني!؟

منتهى قلة الذوق والأدب، موظفات يضرب بيهم المثل بالصراحة

كل ده عشان اجدد البطاقة، واتبهدل في 3 طوابير وفي الأخر  وقت الاستلام البيانات غلط

طيب هو الي بيكتب ده بيكون سكران مثلا عشان يغلط كم الأخطاء دي

ارجعي لشباك 1 لمراجعة البيانات

سلميها في شباك 3 تاني

استني عشر ايام كمان

ويقولك قسم مصر الجديدة من احسن الأقسام في التعامل

فلتذهبوا جميعاَ للجحيم بالجملة

ولا بلاش تتعبوا نفسكم، هي مصر كلها رايحه لو فضلنا بالوضع ده

تحت السيطرة وربع جرام

ربع جرام للكاتب عصام يوسف كانت أول رواية تتحدث عن المخدرات بوضوح تام، تم نشرها عام 2008، كتبت الرواية بلغة المدمنين (يسكور، يضرب، دولاب..الخ) لاقت الرواية هجوم شديد جداً من النقاد والقراء حتى أنا شخصياً واجهة هجوماً حين إشتريتها دون أن أقرأها، من الناحية اللغوية لم تكن ترقى حد الرواية في مفهومها إنما هي قصة يحكيها المدمن عن ذاته، واقعية صادقة لكنها صادمة

تحت السيطرة مسلسل تم عرضه رمضان عام 2015 بطولة نيلي كريم للكاتبة مريم نعوم، له نفس القصة وإستخدم نفس اللغة مع بعض المفاهيم الأخرى، القصة مكتوبة بإحترافية عالية جداً وكذلك تمثيل أغلب الشخصيات كان متميز، تفاعل الجمهور وتعاطفهم مع شخصيات المسلسل كبيرة جدا، ولاقى المسلسل صدى واسع ولعدة أشهر 

لم أفهم سبب إعتراض القراء على فكرة الرواية في الوقت الذي وقفوا فيه منبهرين بقصة المسلسل، وهل تغير فكر المتلقي في 6 أعوام؟! مع أن جمهور القراء - في رأيي- لابد أن يكون أكثر وعياً من المشاهد العادي

شاهدت المسلسل كاملاً في أسبوع تقريباً على اليوتيوب، على الرغم أنه بالفعل رائع كعمل فني، إلا أنني أحسست أن عقلي الباطن بدأ يتقبل فكرة السيجارة كرفيق، إعتدت شكلها وشكل -السرنجه- وحتى شكل التعاطي نفسه

قد أكون من أصحاب الفكر المنغلق قليلاً لكني أشفقت على الشباب الذي يرى هذا الكم من المخدرات وطرق الحصول عليها وتعاطيها، وإن كنت من أصحاب الإستعداد فستغريني الفكرة جداً، رأيت كثيراً من المشاهد التي لم يكن العمل بحاجة لها إلا لترسيخ صورة المتعاطي ثم تقبلها 

أتفهم أننا نملك بداخلنا أمراضاً وتناقضات قد تدفعنا لإدمان أي شيء كالأكل والشراء والجنس وحتى السرقة والمخدرات، لكنها أمراض تحتاج للعلاج ونحن بحاجه لتقبل مريض السرطان والبهاق مثلاً في المجتمع بشكل أكبر

لم يخلوا المسلسل ولا الرواية من الفائدة إن بحثت عنها، فقد أيقنت أن الهدف هو الطريق  أو الرحلة نفسها وليس النتيجة، إجعل كل يوم مهماً في ذاته، قاوم نفسك بمن حولك، ولا تفقد السيطرة أبداً

الحسد

الحسد أصبح حالة مرضية عند أغلب الناس حاليا، كله حاسس أنه محسود، طيب مين إلي بيحسد

وكل الناس بيتشتكي بشكل رهيب

انا بقى لقيت حل عشان اخلص من الشخصيات المزعجه الي بتؤمن بالحسد اكتر من إيمانها بحفظ الله

والي بتشتكي من كل شيء في الدنيا درءاً للحسد

وصلهم إحساس انك بتحسدهم على الوحش ده.. هيبطلوا يتعاملوا معاك اصلا

يا حسسسسود

ما هو الشغف؟

الشغف مش حلم لازم تدور عليه‘ ولا شغل لازم تختاره والا تبقى فاشل ومش هتعرف تنجح في حياتك

الشغف شعور مش شيء مادي، والمشاعر بتتغير 

الي بتحبه النهارده ومبسوط وانت تبتعمله ممكن بكره تبقى مدايق ومخنوق منه

ركز انت مبسوط فين ومرتاح في ايه هتلاقي نفسك

مش مهم تبقى احسن واحد او اغنى واحد المهم تبقى مرتاج ومبسوط

ويااااا ريت لو بتكسب من الي انت بتعمله ده

حقيقي في رحلة البحث المميت عن الشغف بنضيع فرص رهيبه في الحياة

ممكن لو كنا جربنا في الطريق فرصتين او ثلاثة كنا لقينا حاجه اكبر من الي احنا متخيلين انها حلمنا

جربوا، جربوا ترسموا تكتبوا تعزفوا 

اتعلموا حاجه جديدة كل سنة، حتى ولو مش متخيلين ممكن تفيدكم ازاي

سافروا وجربوا اكل جديد واماكن جديدة او حتى قديمة بس اعرفوا تاريخها

جربوا تبيعوا فكرة او حتى اكسسوارات، البيع والشرا بيعلم كتير

جربوا واحكولي :)

فضفضة

عارفين الظفر الغارز (in growing nail)، منتشر جدا وعمليته سهله برضه جدا -المفروض يعني-

من يجي 10 سنين كده او اكتر، ظفر رجلي الشمال غرز جامد لدرجة انه عمل خراج، وكان شكله مأساوي للغاية، ماما -الله يرحمها- قررت اني لازم اروح المستشفى وانها جراحة بسيطة جدا بحكم انها  دكتورة، وهي كان عندها نفس المشلكة وعلمتها مرتين

رحت مستشفى لطيفة في مصر الجديدة، وفعلا في نص ساعه الدكتور خلص وربط رجلي واخدت الأدوية وقالي تعالي بعد اسبوع نشوف الحرج وروحت.. 

عشت يومين عذاب، وجع رهيييييييييب لا يحتمل، وماما فاكراني بدلع، احاول افك الرباط الظاغط، الم فوق الوصف، المهم ماما شكت ان في حاجة غلط وفكت الرباط، ونااااافورة دم فتحت ورجلي كلها لونها ازرق تميل للسواد

جرينا على المستشفى ندخل طوارئ، نروح للدكتور عيادته، مفيش، كله بيتهرب ويقولك خير مفيهوش حاجه هيتزبط لوحده، ماما لفت بيا على دكاترة الاوعية الدموية الي في مصر كلها تقريبا، ادوية ومضادات حيوية ومسكنات بشكل مبالغ فيه، لدرجة اني جالي ازمة مرة من تضارب الأوية وماما لحقتني

جربت حبيبي كل حاجه في الدنيا حتى العسل ومية زمزم، واخر دكتور رحناله كان في الدقي، استاذ كبير في جامعه القاهرة، قال لماما ده خلاص بقاله 3 شهور، دي غرغرينه وغالبا هيتشال، نزلت من عنده بقول لماما ده حمار، انا رجلي كويسة وهتبقى احسن

من كتر الضغط النفسي عليها جالها اكزيما في جسمها رهيبه، ومع ذلك كانت بتتحرك معايا ومسبتنيش ابدا، حتى وقت امتحاناتي الي مكنتش ناوية اروحها، قالتلي هاجي معاك، وفعلا رحت عشانها، وكانت ربطالي رجلي كأنها متجبسة عشان شكلها ميدايقنيش

بعد 4 شهور ربنا رزقنا بدكتور لطيف جدا اسمه امير ناصف، قالي هو في شبح انسجة سليمة ممكن نشتغل عليها، وفي اقل من شهر 

رجلي بقت كويسة الحمد لله، وصباعي متقطعش زي ما الدكاترة كانوا بيقولوا.

#غلطة_دكتور

#ماما_الله_يرحمها

#فضفضة

#بلاش_يأس

25 سنة

النهاردة قررت ارجع 6 سنين لورا

وقفت قدام المراية وصبحت عليا بعد ما كنت نسيت اني بحب اعمل كده

بصتلي وانا بكامل قواي العقليه وقولت

شيكو انت عندك 25 سنة

بصي لشكلك كويس افتكري ملامحك 

افتكري ضحكتك

افتكري جريك وتنطيطك- اه كنت بجري واتنطط عادي

فاكرة :D

رجعيهم بقى

الغي كل حاجة محبطة حواليك

الغي النكد المستمر

الغي اي صوت يسببلك الضيق

ارسملي لنفسك حلم جديد 

وحققيه

بقول لنفسي آسفة على السنين الي ضيعتها

بقول آسفة لكل قرار أخدته غلط

بس العمر الي جاي ممكن ميكونش قد الي راح ولازم الحق نفسي

هحلم لنفسي وهساعد ولادي يحلموا

والي جاي احلى ان شاء الله :D

:D

ينتهي كل شيء عندما تجد من يسمعك، او تجد شغفك في الحياة

سعيدة جدا اليوم، يعتلي وجهي ابتسامة بلهاء كمراهقة تحب لأول مرة

في الحقيقة لا اعلم سبب ذلك ولا اريد ان اعرف

ولاني اكتب عن حزني لابد لفرحي ان يدون هو الاخر حتى لا انسى ان الحياة لا تبقى على حال

ومن حال الى حال اتراقص انا على انغام الثلاثي جبران وصوت محمود درويش في الخلفية 

يحكي له ان يتنظر ويأمره " إنتظرها"