انا حرة :)

الكلام في السياسة أو إبداء الرأي عموماً في مصر حالياً بقى من المستحيلات، لازم تخسر حد، قريب صديق او حتى زوج مش مهم، أهم حاجه إنك متخرجش عن القطيع 

إلي انت المفروض فرد فيه

المشكله إني طول الفترة إلي فاتت بحاول أمسك العصاية من النص، خايفه أخسر حد تاني، بقيت أقول كلام يحمل كل المعاني الممكنة والغير ممكنه عشان كل واحد يفسرة 

على مزاجه ومخسرش حد

وللأسف أحيانا بيفلت مني رأي وألاقي هجوم غريب كأني أنا الي قتلت أو أنا الي حرضت وأنه مش مجرد رأي بس

قررت أتصالح مع نفسي بعد التوهه الرهيبه إلي كنت فيها، هقول إلي انا شيفاه، ومش هجادل حد ولا هحاول أقنع حد، كل الناس قناعاتها الدينية والسياسيه وأيدولجياتها خلاص بقت واضحة فمفيش داعي للجدال العقيم

ثانياً قررت أعمل إلي بحبه، هسمع المزيكا الي بحبها مهما كانت غريبة

 هرسم مع إني مش بعرف

هغني وأنا صوتي وحش عادي :)

هطبخ الأكل الي بحبه :)

هرقص كتييير 

هحب كل حاجه وكل الناس 

حد بقى عنده إقتراحات أغاني حلوة لحالة الجنان الميئوس منها دي ;)

رمضان كريم

أشجع واحدة

لكل بنت أو إمرأة في الدنيا راجل كسرها

أو بكاها

أو حتى كانت معاه بتدور منه على كلمة حلوة

لكل واحدة ثقتها بنفسها إتعدمت بسبب راجل

لكل واحده سمحت لاي إنسان يحولها لكائن غريب عنها

إنت تستاهلي تبقي سعيدة

إنت ضحكتك هي فرحة الدنيا كلها

إنت أشجع واحدة هتاخد قرار وتبقى سعيدة ومبسوطة طول العمر

أشجع واحدة.. مي عبد العزيز

أفكار خارج الخدمة

تقريبا من كتر الفراغ الي بقى في مخي بقيت كل أطلع بفكرة جديدة

اقرر مرة اني هدرب نفسي بنفسي على الكتابة الإبداعية عن طريق الكورسات الاجنبية المتاحة اونلاين

مرة قررت اني اعمل موقع لنفسي واكتب فيه واكون فريق واكبر بقى

المرة الي بعدها قناة على اليوتيوب.. وافكار ليها بالهبل

طيب اعمل راديو من البيت واكلم كل ماما مغتربة مفحوتة مع اولادها الاعزاء زي حلاتي

طيب بلاها كل ده انا هعمل جروب على الفيسبوك وابيع حاجات، اشمعنى انا يعني

لا لا لا انا هستخبى تحت البطانية ومش هعمل حاجه خالص

ايه ده

انا زهقانة 

طيب عيد من الاول

محدش ينوبه فيا ثواب ويشوفلي حاجه اعملها 

#عواد باع ارضه

الهاشتاج ده واخد ترند عالي اوي على تويتر، الفيسبوك جاب اخره والناس رجعت تقتل بعضها وتخسر بعضها على السياسة تاني، المرة دي مش مين هيحكم الارض ومين هيحط القوانين

الخناقة المرة دي على الارض نفسها، الارض الي بتنقص حته حته، الارض الي الناس زمان قلبوا على حكم واحد عشان خافوا يبيعها، وهما نفس الناس دلوقتي الي بيقولوا دي بتاعتهم اصلا مش بتاعتنا

مش هتكلم في التاريخ والحروب والعساكر الي ماتت زمان ولسه بتموت عشان البلد دي

ولا هتكلم على الحكومة الي باعت الناس قبل الارض عشان ضدهم

هتكلم عن شعب قذر وحقير ويبرر الوساخة الي بتعملها الحكومة 

على ناس مش فارق معاهم غير نفسهم ومش هاممهم غير مصالحهم وبس

البلد حالها يحزن والفقر عمال يزيد

وكل شوية يقولوا مشروعات وملايين 

طب هي فين

ولا احنا برضه الي مش حاسين بالتنمية والغنى الي مصر فيه

قالك قناة السويس الجديدة والمؤتمر الاقتصادي

وطلع بلح

طيب سد النهضه ومياة النيل

بلح

قالك هياخدوا جزيرتين ونسيطر احنا على سينا ويدخلنا 200 مليار

لا بجد 

انتوا مصدقين يعني.. بكرة تصلع بلح برضه

هتختصر من مساحة مصر عادي

لقاها كبيرة عليه فقال يقيفها على مقاسه

الي مزعلني بجد الناس الي مش فارق معاها

الناس الي بتقول اصلها بتاعت السعودية 

طيب انا عايشه حاليا في السعودية تحبوا تعرفوا الشعب السعودي بيقول ايه!؟

منتهى القرف بجد 

يا رب هو مصر مكتوب عليها ان الي يحكمها ولاد الكلب كده على طول

..

تجاعيد قلبي الهرم لم تعد تتحمل تفاهات الحب وسخافاته

الحزن لا يليق بالجميلات

هن فقط خلقن للسعادة، للضحكات العالية

لرؤية العالم من فوق السحاب

ليلمس العشق شفاههن في تألق

تلك العيون لم تخلق يوما للبكاء

او للسهر

او للارق

خلقت لتلمع من حب او نجاح

فليكن الله في عون من احب فتاة جميلة 

فلن يرضيها الغزل العادي

ولا الحب الهادئ

فهي مغرورة بكل ما لديها

لا تعرف حدودا في الحب

وستطمع دوما ان يزيد

نروح فين

الناس في مصر مؤخرا بقت بتحاول تدور على اي فرصة للهروب، انما بشغل في الخليج او هجرة لاي دوله في العالم، المشكلة ان حتى الدول برة سواء في الخليج او غيرة 

واقعها مش مختلف كثير عن مصر

سعر البترول الي نزل وهينزل كمان خلى الدول دي بتتخبط وخصوصا السعودية، فك العقوبات عن ايران وتسهيل تصديرها للنفط ضرب الدول العربية في مقتل

واسوأ الاوضاع على الإطلاق في السعودية، أزمة بترول مع حرب على اليمن استنزفت كل مواردها الاقتصادية تقريبا، الحكومة رفعت كل الاسعار ( بنزبن، وكهربا ومية وايجارات) بيضغطوا على الناس بشكل رهيب

ازمة شركة بن لادن بعد حادثة الرافعه في الحرم خلت وضع المهندسين مزري

مفيش رواتب، تصفية موظفين بشكل جنوني

وكل القطاعات من المقيمين اتأثرت بشكل او بأخرخلى الوضع المعيشي في السعودية صعب

والكويت قبلها بكام سنة سدت كل الطرق على المقيمين ورفعت عليهم الاسعار وقللت المرتبات 

قطر هي افضل دول الخليج حاليا، وخصوصا مع الاستعدادات الرهيبه لإستضافة كأس العالم، والمشروعات الضخمة 

الإمارات برضه الوضع صعب على المقيمين وعلى المصريين بشكل خاص، الاسعار جنونية والإيجارات تعتبر من الأغلى على مستوى العالم

مقدرش اقول لحد خليك في مصر لو جالك فرصة في الخليج لأن الوضع في مصر كلمة سيء أو مزري قليلة عليه، بس الوضع براها مش بالروعة الي الناس متخيلاها

ياريت الواحد يعرف يهاجر دولة أجنية وياخد جنسية تخليه يقدر يعيش كبني آدم 

الحكومة ومصالحها

تباَ للمصالح الحكومية في مصر، وتباَ لكل الشبابيك بها

الاستمارة شباك 4

التسليم شباك 3

طيب ما حضرتك تسلميها للي جنبك مش لازم اخد الطابور من اوله تاني!؟

منتهى قلة الذوق والأدب، موظفات يضرب بيهم المثل بالصراحة

كل ده عشان اجدد البطاقة، واتبهدل في 3 طوابير وفي الأخر  وقت الاستلام البيانات غلط

طيب هو الي بيكتب ده بيكون سكران مثلا عشان يغلط كم الأخطاء دي

ارجعي لشباك 1 لمراجعة البيانات

سلميها في شباك 3 تاني

استني عشر ايام كمان

ويقولك قسم مصر الجديدة من احسن الأقسام في التعامل

فلتذهبوا جميعاَ للجحيم بالجملة

ولا بلاش تتعبوا نفسكم، هي مصر كلها رايحه لو فضلنا بالوضع ده

تحت السيطرة وربع جرام

ربع جرام للكاتب عصام يوسف كانت أول رواية تتحدث عن المخدرات بوضوح تام، تم نشرها عام 2008، كتبت الرواية بلغة المدمنين (يسكور، يضرب، دولاب..الخ) لاقت الرواية هجوم شديد جداً من النقاد والقراء حتى أنا شخصياً واجهة هجوماً حين إشتريتها دون أن أقرأها، من الناحية اللغوية لم تكن ترقى حد الرواية في مفهومها إنما هي قصة يحكيها المدمن عن ذاته، واقعية صادقة لكنها صادمة

تحت السيطرة مسلسل تم عرضه رمضان عام 2015 بطولة نيلي كريم للكاتبة مريم نعوم، له نفس القصة وإستخدم نفس اللغة مع بعض المفاهيم الأخرى، القصة مكتوبة بإحترافية عالية جداً وكذلك تمثيل أغلب الشخصيات كان متميز، تفاعل الجمهور وتعاطفهم مع شخصيات المسلسل كبيرة جدا، ولاقى المسلسل صدى واسع ولعدة أشهر 

لم أفهم سبب إعتراض القراء على فكرة الرواية في الوقت الذي وقفوا فيه منبهرين بقصة المسلسل، وهل تغير فكر المتلقي في 6 أعوام؟! مع أن جمهور القراء - في رأيي- لابد أن يكون أكثر وعياً من المشاهد العادي

شاهدت المسلسل كاملاً في أسبوع تقريباً على اليوتيوب، على الرغم أنه بالفعل رائع كعمل فني، إلا أنني أحسست أن عقلي الباطن بدأ يتقبل فكرة السيجارة كرفيق، إعتدت شكلها وشكل -السرنجه- وحتى شكل التعاطي نفسه

قد أكون من أصحاب الفكر المنغلق قليلاً لكني أشفقت على الشباب الذي يرى هذا الكم من المخدرات وطرق الحصول عليها وتعاطيها، وإن كنت من أصحاب الإستعداد فستغريني الفكرة جداً، رأيت كثيراً من المشاهد التي لم يكن العمل بحاجة لها إلا لترسيخ صورة المتعاطي ثم تقبلها 

أتفهم أننا نملك بداخلنا أمراضاً وتناقضات قد تدفعنا لإدمان أي شيء كالأكل والشراء والجنس وحتى السرقة والمخدرات، لكنها أمراض تحتاج للعلاج ونحن بحاجه لتقبل مريض السرطان والبهاق مثلاً في المجتمع بشكل أكبر

لم يخلوا المسلسل ولا الرواية من الفائدة إن بحثت عنها، فقد أيقنت أن الهدف هو الطريق  أو الرحلة نفسها وليس النتيجة، إجعل كل يوم مهماً في ذاته، قاوم نفسك بمن حولك، ولا تفقد السيطرة أبداً