قوة الكلمة

الكلمة الحلوة لها تأثير السحر.... يمكن

كلمة الراجل زي حد السيف... كلاااااااام

الكلمة شرف وميثاق... ده ايام جدي وجدك

الكلمة اتقال فيها كلام كتيييييير اوي يمكن عشان تاثيرها على الناس غالبا بيكون اكبر من حجمها

ممكن تقوم حرب او ثورة بسبب كلمة

فاكرين وامعتصماه

المعتصم بالله جهز جيش بحاله بعدته وعتاده عشان امرأة استنجدت بيه، فتحت عموريه بسبب كلمة

تخيل انت بقى واقف عند الكشك مع اصحابك وبين كل كلمة وكلمة لازم تجيب سيرت السلوك الغير قويم لام واحد منكم

او تشكك في رجولته، الكلمة دي ممكن تعمل ايه... اكيد تفتح دماغك مش عموريه

تخيلي انك قاعده مع صحباتك في ديش بارتي ولا في النادي وماسكين بعض، لا لا لون شعرك ده مكبرك اوي، او لا لبسك ده واسع اوي كده ليه يا بنتي انت جسمك حلو مخبياه ليه

احنا ليه مستهونين بقوة الكلمة وقوة تأثيرها على الي حولينا

اقولك حاجه حلوة ممكن تجربها

اختار مجموعة كلمات يكون ليها نفس التأثير يعني يا كلها سلبيه يا كلها ايجابيه

وتعامل بيها لمده اسبوع

ولا اقولك لمده يوم واحد.... واحد بس

شوف تأثير كلامك على الي حواليك وعليك انت شخصيا

لو الكلمة ملهاش تأثير مكنتش هتبقى هي وسليه التواصل الاولى كل السنين دي

الحلم والأمل :)

الحلم هو ذلك الشيء الذي لا نمل من تخيله، كلما نكبر فإنه يكبر معنا

 نأمل كل يوم في تحقيقه ولا نمل أبداً منه أو ننساه أو حتى نتوقف عن الحديث عنه

نستيقظ لنعيد نفس الحلم بتفاصيل مختلفة  أو حتى نفس التفاصيل القديمة مع بعض الرتوش

لا بد أن يتحقق يوماً ما... الثقة أنه سيتحقق يجعله واقعاً جميلاً :)

ومازال حلمي يكبر كل يوم  :)

الشيطان بجد كائن كئيب

الواحد يبقى قاعد في امان الله بيتفرج على صوره في فرح ولا رحله ولا خروجه حلوه

يلاقي الشيطان راح طالع في دماغه يقوله

ايه ده انت شكلك كان عامل كده ليه... ايه الضحكه العبيطه دي

اوحش واحده وسط صحباتك... طول عمرك مش بتعرفي تلبسي

يفتح الباب لمخك على النكد من اوسع ابوابه، مع ان الصور حلوة لذكريات جميله

بس هو كده لازم ينكد على الواحد

لا والاغلس بقى... بتقعد تدعي لربنا بحاجه نفسك فيها من زمان

تلاقي دماغك شغاله.. طب هي هتيجي ، طب يعني لو مش خير ابقى بدعي بشر

 اييييييييييييه النكد ده، ادعي وربنا هيحققلك الي فيه الخير ليك

مش ممكن بجد

واذا ربنا استجاب لدعاك.. فاكر انه هيسيبك ابسلوتلي

تلاقيه بقى زن زن زن

لو دعيت تدخل الكليه الفلانيه ودخلتها

يطلعلك بقى... المواد صعبه وشكلي مش هنجح

ايه الدكاتره الغلسه دي انا مش رايح

الكليه بعييييييييييييده جدا والعيال رزله

تدعي ان ربنايرزقك بالزوج والذريه وربنا يحققلك حلمك
يطلعلك القطط الفاطسه
ايه الغيرة الي تخنق دي
العيال مش متريبه
انا معرفتش اختار صح من الاول

ينسيك تقول الحمدلله على النعمه

ويكرهك في الدعاء

ويرزل عليك وقت امبساطك

حقيقي اعوذ بالله منه 

بلا مبادئ

رايت اولئك الذين يدعون الاخلاق، ويدعون التمسك بها.. لكن ما تلبث ان تفضحهم السنتهم او مواقفهم، 

ثم رايت من يدعون انهم اصحاب المبادئ، وهي لم تتخطى كونها شعارات رنانه ولا شئ على الارض يلمس

في الماضي لم اميز جيدا بين القول والفعل... اصبت بالارتباك ولم اعرف ان كان العيب في الاشخاص انفسهم ام في افعالهم

اختلط عندي الحابل بالنايل ، واصبحت اعيب الاثنين معا

ثم قررت ان الاخلاق لا تتجزأ لكن المبادئ لا وجود لها... الاخلاق محدده للجميع، لا تكذب، لا تسرق، قل خيرا او اصمت

 لكن ما هي المبادئ .. لم يستطع عقلي الضئيل ان يصل الى تعريف لها او حتى ما تعنيه، رأيت التمسك بالمبادئ تعنت من اصحابها لبعض الاراء لا اكثر

مع الوقت لم افهم قدرة بعض الاشخاص على التمسك بأرائهم لهذه الدرجه.. فالرأي قد يتغير تبعا لمتغيرات الاحداث، لكنهم لا يتغيرون، بعضهم لا يقبل التحدث بنصف علم ولو كان النصف يكفي لايصال المعلومه، بعضهم لا يقبل الجلوس في اجواء اللهو واللغط حتى وان كان ابتعاده عنها سيجعله وحيدا. اهذه اخلاقهم؟

وعدت الى نقطة البدايه... ما هي المبادئ؟ 

رزقني الله بمن فسر لي منها اليسير... قال: ان المبدأ هو المنهج الذي اختار ان انتهجه في معاملاتي، هو الطريق الذي ارتأيت ان اسلكه لاعيش حياة اكون بها راضيه عن نفسي وعن قراراتي ، هو نقطة الانطلاق التي احدد بها موافقتي من عدمها على مواقف او اراء بعينها.

من اي تأتي؟

تأتي من البيت والتربيه اولا، من المدرسه ..من المحيط حول الانسان، يختار منها ما يشاء وما يتناسب من عقيدته واخلاقه وتربيته، يختار من يريد ان يصبح ولا يكترث بما يقوله الناس عنه،

لكن ليس كل ما قد يطلق عليه مبدأ قد اراه صحيحا ولو تمسك به البعض.. لم ينفي هذا عنه مسمى المبدأ، فبعضهم قد يفعل اي شيء ليستمر في عمله ولو على حساب غيره...  مبدأه المال اهم من اي شيء

هو قد يراه صحيحا وقد يراه غيره غير ذلك... هنا يأتي الاختيار 

قررت ان اختار مبادئي.. ان اختار ما استطيع ان اصل به لرضى الله.، وان اعامل خلقه   بما يحب سبحانه.

اعلم ان مبادئك هي انت في تعاملتك وارائك ... فكن ما تشاء :)

ان تكون غير مرئي...invisible

احيانا بحس انه موضوع يزعل واحيانا بيبقى هاين عليا افطس من الضحك

هو يا ربي في كده

انك تكلم الناس في التلفون ومحدش يرد عليك... كلهم فجأه كده

انك تبعت ميل وبرده محدش يرد

الاغرب انك ترد في ميل في اكتر من 50 شخص وانت الوحيد الي ميتردش عليه

كأن كلامك مش موجود اصلا

تكتب ستيت على الفيس ولا حياة لمن تنادي

بالذمه مش حاجه تدعو للسخريه.

انا لو حد منفسن -وده وارد جدا- هقفش على الناس كلها

بس محدش هيحس اني قافشه اصلا

اقوم ازود نسبه النفسنه شويه وافضل اتكلم وابعت حاجات غلاسه والسلام

بس ممكن الموضوع ده يبقى ليه ميزه اني افكر في حاجه ممكن اعملها لوحدي

اقرأ حاجه، اتعلم حاجه، 

لحد ما الناس تصحى وتفتكر اني لسه هنا

بس لما يفتكروا والله ما انا عتقاهم 

:)

مش عارفه

مش عارفه ده بقى بالنسبالي منهج حياه...

مش عارفه عايزه ايه من الدنيا... او الدنيا عايزه مني ايه

احنا في الدنيا ليه... ده سؤال بديهي وكلنا عارفين اجابته

احنا بقى عايزين من الدنيا ايه؟؟

النجاح؟ الحب؟ السعاده؟

كلها عموميات بنكافح عشان نوصلها بس ازاي

الطريقه بتختلف من واحد لواحد

وسعداء الحظ مش كتير

السؤال الي بسأله لنفسي دلوقتي

انا عايزه ايه من الدنيا؟

ويارب تتغير الاجابه وابقى عارفه :)