احساس جميل جدا لما تعلم حد حاجه جديده وينتفع بيها, انا بالنسبه ليا مروة اختي الصغيرة كانت حقل التجارب وبصراحه لحد دلوقتي, اول حاجه علمتهالها ازاي تكتب اسمها كان لسه عمرها 3 سنين او يمكن اكبر شويه.
فضلت تكتبه في كل مكان على الورق والحيطان, كانت حتى بتكتبه من الشمال لليمين زي الانجليزي مع اني علمتهولها بالعربي, ولحد دلوقتي لسه اسمها مكتوب على الحيطه مش راضيين ندهنوا, بصراحه عشان نذلها بيه شويه.
اكتر حاجه بحبها اني لما بعلمها حاجه بتثبت في مخها ان هو ده الصح, يمكن عشان لسه خبرتها في الحياه معدومه, في الاول كنت بقع اضحك اوي عليها لما اعلمها حاجه غلط او اقولها معلومه غلط وهي تروح تقنع بيها اصحابها وتزعل جدا لما حد يقولها ان الي هي بتقولوا غلط , وترجع تقولي هو انت ممكن توليلي حاجه غلط, وانا بكل شهامه اقولها لأ طبعا, بس بعد كده لقيت اني لازم اعلمها الصح او على الاقل لو انا مش عارفاه اسيب غيري يعلموهلها, بس بيبقى حلو احيانا اني استغل سذاجتها
متزعليش مني يا احلى مروة في الدنيا كلها عشان انت عارفه انا بحبك اد ايه.
2 comments:
انا عايز اقول اني بس هعلق علي البوست دا علشان ان كان بيحصل معايا نفس الموضوع دا بس كنت انتا زي مروة كدا وكان اللي بيحصل ان اختي اللي اكبر مني كل ما اقولها حاجة عرفتها تقوم تقولي لا دا غلط وتقعد تبرر كلامها وانا علشان كنت صغير ومش فاهم حاجة كنت دايما بصدقها لحد ما عرفت مدي طبتي وسذاجتي بس الحمد لله اجتزت الفترة دي عقبال مروة
Post a Comment