ليه كل لما ابص في المرايه ببقى متأكده ان دي انا !!؟؟

يعني هي هتجيب حاجه من برة, ايه الذكاء ده؟, بس اصله سؤال طرح نفسه عليه, ليه لازم الشخصيه الي في المرايه دي تكون انا؟, يمكن علشان المخ اتبرمج على الصورة دي خلاص فمعندوش استعداد انه يشوف غيرها, طبعا ما انا هتصطم لو صحيت الصبح كده وبصيت في مرايه الحمام بعد ما اغسل وشي ولا قيت حد تاني.... اكيد هغير الصابون.

كتير بقعد اتخيل لو المرايه دي بتنقل الصورة الي جوة, الي جوايا مش الي جوة المرايه ها نركز شويه, ممكن تكون الصورة عامله ازاي؟؟, يعني لو انا مكتئبه هيكون شكلي ازاي, طب لو فرحانه, ولما بفكر في مصيبه اعملها, اكيد شكلي هيتغير في كل مرة... بس هبقى عامله ازاي؟, هذه هي المشكله.

البني ادم مثلا لما بيجيلوا برد منخيرة بتحمر وبيخنف وحاجات كده, ما هو برضو لما يفرح ممكن صوته يحلو..... ليه لأ, ومثلا تاني.... ما بينوكيو لما بيكذب منخيرة بتكبر -ايه حكايه المناخير النهارده-, ممكن لما الانسان يعمل خير يخس -اصل عندي عقده من موضوع الخساسان ده-, او يتخن اصل في ناس برضو حالتها صعبه حرام.

تصدقوا ان الحاجات المستخبيه جوه كل واحد لو طلعت بره هتبقى مصيبه, انا مثلا ممكن يبقى لوني اسود لما اشوف ناس كده بكرهم -اتحول يعني-, كده هما هيعرفوا اني بكرهم, لألألألألألألأ ,كده تبقى فضحيه, انا رجعت في كلامي, مالها المرايه كده زي الفل.