قبور ديلوكس خمسة نجوم

وصلني ايميل حرق دمي واستفزني لاقصى درجه, قررت اعمله بوست على الرغم من اعتراضى على وضع ميلات في المدونه, بس ده مختلف وايمانا مني بنجاح فكره نقل اللعنه فأنا هنقلكم لعنه حرقت الدم الي حصلتلي يمكن تروح مني.
الميل بيقول ان في سيدة لبنانيه توصي بدفنها على سرير وثير, قولت انا عادي ست معاها شويه فلوس وعايزة تغّير شويه ,بدل ما تدفن في تابوت تدفن على سرير بس الصورة كانت غير كده ,دي عامله قوده نوم مش سرير

وايه المساحه دي, دي لو في مصر كانوا قسموها وبعوها شقق, والي استفزني اكتر ان هي برضو مدفونه في التابوت وهو الي فوق السرير مش هي, لأ والورد عامل جوة تحفه مع الميتين

انا بقول يمكن هي كانت بتقرأ في تاريخ الفراعنه كتير لحد ما مخها راح يا عيني, بس هي واخده الفراعنه على مودرن شويه او يمكن ماكنش معاها يكمل تبني هرم

التعليق الي على الصورة التانيه هو الي حرق دمي اكتر واحد- على اعتبار ان لسه في دم يتحرق- التعليق بيقول( لا حول ولا قوة الا بالله شوفوا التمثال وانتوا تعرفوا ديانتها)

طبعا لا حول ولا قوة الا بالله, بس ايه علاقه الي هي عاملاه بدينها دي واحده لاسعه قررت تخلي قبرها شبه قوده نومها على اساس متحسش بالوحده مثلا, او أياً كان السبب ,يعني لو واحد قرر انه يوصي ان جثته تتحرق زي ما بره بيعملوا مهما كانت ديانته نعيب على الديانه دي ولا على الشخص الي طلب كده
وبعدين مسكت في التمثال وسابت الخمسه كيلو خمرة الي وخداهم , بس بجد هي الي ماتت مستنيه مين يزورها ويشرب معاها؟؟
شوشو يا عيني مش هيفضالها او يمكن بعد ما يخلص شغل يعدي عليها يشربوا شويه, انا حاسه اني اتجننت مش كده.
وبعدين ماشاء الله عليها واخده كل حاجه عشان تتسلى تلفزيون ودي في دي واكيد واخده افلام كتير عشان لو القعده طولت, وبعدين لو حبت تخرج معاها لبسها وجزمها ومكياجها مش ناقصها حاجه


اخر حاجتين عشان مصدعكوش

اولا كميه الناس الي بتتفرح دي ولا كأنه ماتش كورة,او التليفزيون بيصور, مجمعين عند النبي ان شاء الله ,مش ينزلوا يساعدوا الغلابه الي تحت ولا هي بحلقه وخلاص
ثانيا وده الاهم المكان ده هيقفلوه ازاي ,انا قعدت اتخيل كده ان ممكن يعملوا حاجه زي غطا البلاعه كده او يرصفوا عليها على أساس ان دي برضو بلاعه,بس انا مع اقتراح الغطا على اساس ان المقبره دي- لو جاز اني اسميها كده- هتتنهب زي مقابر الفراعنه كده فيا نسهل على الناس يا يعينوا عليها حراسه عشان ما تتسرقش واقتراح التسهيل اوقع عشان في ناس محتاجين كتير, انا مش ببرر السرقه لا قدر الله بس قلبي واجعني من الناس الي ربنا مديهم ومش عارفين يودوا فلوسهم فين غير العبط والهبل, ده لو اتبرعت بربع الي هي عملت بيه قوده موتها ده كانت ماتت مرتاحه

حسبي الله ونعم الوكيل