صحيح اننا دلوقتي نعيش حالة من السلام المؤقت مع المظاهرات وخصوصا بعد مظاهرة 6 ابريل الي بيقولوا انها نجحت ، و 4 مايو الي
برضو هما بيقولوا انها فشلت ، والاتنين في نظري فبّركه عشان الحكومه تعرف مين القوة السياسه الحقيقه المحركة للشعب ، ودور الاخوان
المسلمين بالذات وتأثيرهم
يعني مظاهرة 6 ابريل محدش كان عارف مين الي منظمها بالضبط ، ظهرت فجأة واتقبض فيها على ناس كتييير جدا ، الي انا مستغرباه ان
اسراء عبد الفتاح الي الحكومه قالت انها هي الي نظمت للمظاهرة دي اتقبض عليها شويه والشعب تعاطف جدا معاها وافرج عنها بعد كده
وقالت تصاريح رائعة عن جمال الحكومه وحلاوة سجونها ، في نفس الوقت الي اتقبض في على ناس تانيه في المحلة وغيرها ومدونين كتير
في ناس لسه مقبوض عليهم لحد دلوقتي طب ازاااااااااااي؟؟؟
ومظاهرة 4 مايو الي فشلت قال ايه عشان الاخوان الي نظمتها وده يبين مدى ضعف قواها السياسه ، وفجأة بعدها كل المظاهرات
والاعتصامات اختفت ، الحكومة تقريبا عرفت دية الشعب فقتله
مش ده موضوعنا اصلا بس دي بداية فرضت نفسها عليا بما اني هجيب سيرة المظاهرات
لقيت طريقة جديدة او على الاقل انا مش عارفاها واستغربت جدا ازاي فاتت الطريقة السهله دي على حكومتها العزيزة
الهند بتعمل ايه بقى لما تبقى في مظاهرة خنيقة بتتبع منهج خراطيم المطافي المعروفه عالميا لفض المظاهرات بس بتلون المية
بتاعتها
حد بعرف يقولي هما بيعملوا كده ليه ؟؟؟؟؟؟ ، صح برافو شاطرين عشان على الله يلاقو واحد على قميصه لون المية دي يبقى نهاره
اسود ....لا معلش يبقى نهارة موف
يتجرجر على طول وممكن يروح ورا الشمس
قال صحيح هو في ايه ورا الشمس ؟؟؟؟
2 comments:
ايه اللى ورا لشمس
لو حابه تعرفى زوريهم بنفسك هتلاقى هناك احترام ميه ميه هيخلى قفاكى _طبعا لو حابه بس لكن بعد الشر_آخر حلاوه وهتشوفى من انواع الحشرات مالم يخطر لكى على بال
لو تسمحى احط اللينك بتاعك فى مدونتى
تحيــــاتى
المصـــــــرى
يااا انا مكنتش اعرف ان الشمس مخبيه وراها ده كله
وطبعا اتفضل حطه دي مش محتاجه استأذان خالص
Post a Comment