اولادي

اعلم ان جودة الصور سيئة جدا جدا، وده لسبب بسيط جدا ان انا اولا مش بعرف اصور ثانيا ان الاطفال مش سايبين ايدي في حالها

عليّ وفاروق، بحبهم جداااااااااااااااااا لدرجة اني بفكر اغير اسماء اطفالي عشان خاطرهم، فاروق بيفكرني بعمر، وعليّ -بتشديد الياء- بيفكرني بعبد الرحمن

وطبعا دي نظارتي انا، تعبت جدا بعدها عشان اصلحها

على الرغم اني مكنتش بحب الاطفال خاااااااااااااااااااااالص، بجد مش بحبهم، ولا بحب اتعامل معاهم، على اد ما حبيت الولاد الي بدرسلهم، في الاول كنت بدايق لما حد يقول على الاطفال في الكلاس بتاعي ولادك عملوا او سوا، بس مع الوقت بقيت انا كمان بقول ولادي، بجد حاسة انهم اولادي ببقى معاهم من 8 الصبح لغاية 4.30 تقريبا، بعلمهم كل حاجة مش بس لغة

كنت في الاول بعيط طول الوقت وبقول انا مش قادرة خلاص، دلوقتي يوم الاجازة بتصل عشان اطمن عليهم، فيهم حاجه غريبه بالنسبة ليا مش عارفة ايه هي

عليّ مثلا متعب جدا جدا جدا وشقي ولازم كل يوم يعمل مصيبة، يعض حد، يقع يتعور، حتى مامته مسمياه

troubles maker

بس يوم لما يكون تعبان وميجيش بحس ان الكلاس ساكت وهادي، ببقى اه مرتاحه شوية بس بيوحشني بلماضته، مرة كنا في الجاردن وزعقتله قالي "يالا روحي على كلاس بسرعة، واقعدي لوحدك" بيعاقبني عشان بزعق

وفاروق ما شاء الله عليه عنه حلول لكل المشاكل الي في الدنيا، ويناقشني في اي موضوع بمنتهى الجدية، قال يعني هو فاهم كل حاجة، احيانا لما بينام ويحصل موقف ابقى عايزة اصحيه وقوله، بس بما انه مازال طفل لما حد بيصحيه بيبقى مامته داعيه عليه، لانه بيكون مدايق ويرجع طفل وعياط وزن، بس برضه بعياطه ده بحبه

الدنيا بتغير بجد